सिन्धुपाल्चोक जिल्लाको मेलम्ची नगरपालिकाले आर्थिक वर्ष २०८१÷८२ मा हल गोरु पाल्ने २४० कृषकलाई प्रोत्साहन रकम उपलब्ध गराएको छ ।
पछिल्लो समय गोरु पाल्ने प्रचलन हराउँदै जान थालेपछि मेलम्ची नगरपालिकाले प्रति हलगोरुलाई ५ हजारका दरले कृषकलाई प्रोत्साहन रकम उपलब्ध गराएको नगर प्रमुख आइतमान तामाङले बताउनुभयो ।
अनुदान पाउने किसानले अनिवार्य बिमा गर्नुपर्ने नगरपालिका कृषि विकास शाखाका प्रमुख अमरनाथ आचार्यले जानकारी दिनुभयो । अनुदान रकम बैंक खाता मार्फत र बिमा भएको तर बैंक खाता नभएको किसानलाई भरपाई गरेर रकम उपलब्ध गराएको आचार्यले जानकारी दिनुभयो ।
नगरपालिका भित्रका २४० जना हलगोरु पाल्ने कृषकलाई अनुदान दिइने योजना रहेकाले सोहीअनुरूप बजेट समेत विनियोजन गरिएको नगरपालिकाले जनाएको छ ।
यस्ले प्रांगारिक मल उत्पादनमा सहयोग पुग्नुका साथै माटो सुधार गर्न र जैविक विविधतामा समेत सुधार ल्याउने अपेक्षा गरिएको नगर उपप्रमुख उमा प्रधानले बताउनुभयो ।
